KHUTBAH JUM’AT BAHASA JAWA : HALAL BIHALAL

KHUTBAH JUM’AT BAHASA JAWA :

HALAL BIHALAL

Ed. : ANIS PURWANTO

إِنَّ الْحَمْدَ لِلَّهِ نَحْمَدُهُ وَنَسْتَعِيْنُهُ وَنَسْتَغْفِرُهُ وَنَسْتَهْدِيْهِ وَنَعُوذُ بِاللهِ مِنْ شُرُوْرِ أَنْفُسِنَا وَمِنْ سَيِّئَاتِ أَعْمَالِنَا، مَنْ يَهْدِهِ اللهُ فَهُوَ الْمُهْتَدُ وَمَنْ يُضْلِلْ فَلَنْ تَجِدَ لَهُ وَلِيًا مُرْشِدًا. أَشْهَدُ أَنْ لاَ إِلَهَ إِلاَّ اللهُ وَحْدَهُ لاَ شَرِيْكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُوْلُهُ لاَ نَبِيَّ بَعْدَهُ. اَللَّهُمَّ صَلِّ وَسَلِّمْ وَبَارِكْ عَلَي حَبِيْبِنَا وَشَفِيْعِنَا وَمَوْلَنَا مُحَمَّدٍ وَعَلَى آلِهِ وَأصَحابهِ اْلأَخْيَارِ وَمَنْ تَبِعَهُمْ بِإِحْسَانٍ إِلَى يَوْمِ الدِّيْنِ.

قَالَ تَعَالَي عَزَّ مِنْ قَائِلٍ: يَا أَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ. أَمَّا بَعْدُ.

Ma’asyiral Muslimin jamaah jum’ah rokhimakumullah.

Langkung rumiyin, sumangga kita sami nyaosaken puja puji syukur ing ngarsa dalem Allah SWT, ingkang sampun paring nikmat, rahmat sarta hidayah dhumateng kita sedaya. Sahingga kanthi ijin Allah SWT, kita saget nindakaken ibadah dhumateng Allah SWT. Kita nyuwun dhumaateng Allah SWT mugi-mugi ibadah kita ing siyang punika saget katampi dening Allah SWT, amin ya rabbal ‘alamin.

            Shalawat saha salam mugia katur dhumateng Gusti Rasul, Nabi Agung Muhammad SAW, ingkang sampun mbimbing dhumateng sedaya kaum muslimin, tumuju margi ingkang utami. Mugi-mugi kita sedaya pikantuk syafaatipun mbenjang wanten ing yaumul kiyamah, bekja fiddun ya wal akhirah, amin ya rabbal ‘alamin.

Ma’asyiral Muslimin jamaah jum’ah rokhimakumullah.

            Dinten Jum’at samangke punika,  kita nembe kemawon mahargya Idul Fitri 1 Syawal 1439 H, malah sampun setunggal minggu kita mahargya idul Fitri. Lan kita sampun mboten nindakaken kegiatan-kegiatan, kados ingkang kita tindakaken wonten ing wulan ramadhan, kados shalat tarawih, tadarus lan ibadah siyamipun. Sumangga nilai-nilai pengibadahan ing wulan Ramadhan punika kita lestantunaken terus. Kanthi makaten nilai ketaqwaan ingkang minnangka kasil saking anggen kita nindakaken ibadah siyam saget kita jagi, syukur malah saged kita tingkataken.

Para sederek, ing wulan Syawal punika asring kita ngawontenaken kegiatan Halal Bihalal. Acara punika pancen wonten sambung rapetipun kaliyan  Idul Fitri. Wondene syari’at mahargya idul Fitri erat sanget sesambetanipun kaliyan siyam Ramadhan.  Sahingga Halal Bihalal, idul fitri lan Siyam Ramadhan, minangka rangkaian ingkang mboten saget dipun pisahaken. Halal Bihalal minangka pahargyan ing idul fitri, dene idul Fitri kita pahargya sak sampunipun kita nindakaken siyam Ramadhan.

Tiyang ingkang nindakaken siyam Ramadhan kanthi imanan wah tisaban tartamtu badhe dipun ghufira lahu mataqodam mindhanbih, badhe dipun apura dosane kang uwis-uwis dening Pangeranipun. Anangin dosa antawisipun manungsa kaliyan sasamining manungsa.  Atur keterangan menika ingkang andasari wontenipun halal bihalal. Kados kasebat ing Al-qur’an surat Ali Imran ayat 133-134 :

وَسَارِعُوٓاْ إِلَىٰ مَغۡفِرَةٍ۬ مِّن رَّبِّڪُمۡ وَجَنَّةٍ عَرۡضُهَا ٱلسَّمَـٰوَٲتُ وَٱلۡأَرۡضُ أُعِدَّتۡ لِلۡمُتَّقِينَ (١٣٣) ٱلَّذِينَ يُنفِقُونَ فِى ٱلسَّرَّآءِ وَٱلضَّرَّآءِ وَٱلۡڪَـٰظِمِينَ ٱلۡغَيۡظَ وَٱلۡعَافِينَ عَنِ ٱلنَّاسِ‌ۗ وَٱللَّهُ يُحِبُّ ٱلۡمُحۡسِنِينَ

 “Lan sira kabeh padha gegancangana nyuwun pangapura marang pangeranira, lan padha gegancangana marang usaha bisa dilebokake suwarga kang jembare padha karo jembare langit lan bumi, kang disediakake kanggo wong-wong kang taqwa marang Allah. Yaiku wong-wong kang padha nginfakake bandhane kanthi becik ana ing mangsa seneng lan susah, lan wong-wong kang bisa ngampet nesune, lan wong-wong kang seneng aweh maaf marang kaluputane wong liya, allah iku remen banget marang wong-wong kang gawe kebecikan”.

Ma’asyiral Muslimin jamaah jum’ah rokhimakumullah.

Halal bihalal mengku maksud paring pangapunten ing kalanganipun kita umat islam, antawisipun seteunggal lan sanesipun. Ing swasana halal bihalal makaten punika, kita ingkang anggadhahi kalepatan dhateng tiyang sanes, mboten isin, mboteng ewuh-pakewuh purun nedha pangapunten, dene tiyang ingkang kita suwuni pangapunten ugi kanthi ihklas nyukani pangapunten. Makaten timbal balik.

Kanthi makaten Halal bihalal jelas minangka acara ingkang sae, ingkang anggadhai maksud lan tujuan ingkang luhur, inggih punika dipun ngapura sedaya dosa lan kalepatan. Sepisan, dosanipun  kawula dhateng pangeranipun, lan ingkang angka kalih, dosa lan kalepatan antawisipun tiyang dhateng sasaminipun.  Kanthi halal bihalal kita anggadhahi niat ingkang kiat nedya wansul dhateng alam fitrah, wangsul  dhateng kawontenan ingkang suci.

Lan kanthi halal bihalal, kita sedaya ngakeni kanthi pengakenan ingkang ihklas, bilih kita mesthi kadunungan sipat sarwi kirang, sipat asring lepat. Sahingga kanthi kesadaran  menika kita lajeng genancangan nyuwun pangapunten. Kados kasebat ing Surat Ali Imran ayat 159 :

ففَٱعۡفُ عَنۡہُمۡ وَٱسۡتَغۡفِرۡ لَهُمۡ وَشَاوِرۡهُمۡ فِى ٱلۡأَمۡرِ‌ۖ فَإِذَا عَزَمۡتَ فَتَوَكَّلۡ عَلَى ٱللَّهِ‌ۚ إِنَّ ٱللَّهَ يُحِبُّ ٱلۡمُتَوَكِّلِينَ

 “Mula saka iku aweha maaf marang wong-wong mau, lan sira musyawaraha karo wong-wong ana ing urusan iku. Wusana yen sira wis nggolong-nggiligake tekad, sira tawakkala marang Allah. Awit satemene Allang iku remen banget marang wong-wong kang tawakal marang Panjenengane”.

Ma’asyiral Muslimin jamaah jum’ah rokhimakumullah.

Akhiripun, mugi-mugi kanthi halal bihalal kita lajeng saget mendhet hikmahipun. Kesempatan halal bihalal punika supados dipun ginakaken kangge nyuwun pangapunten. Sahingga Sambung rasa lan  jalinan kekeluargaan sangsaya raket, kebak kasih sayang ing ikatan ukhuwah islamiyah. Mugi-mugi manggih kawilujengan ing ndonya ngantor ing akhirat ,  amin ya rabbal ‘alamin.

بَارَكَ اللهُ لِيْ وَلَكُمْ فِي الْقُرْآنِ الْعَظِيْمِ، وَنَفَعَنِيْ وَإِيَّاكُمْ بِمَا فِيْهِ مِنَ اْلآيَاتِ وَالذِّكْرِ الْحَكِيْمِ. أَقُوْلُ قَوْلِيْ هَذَا وَأَسْتَغْفِرُ اللهَ الْعَظِيْمَ لِيْ وَلَكُمْ وَلِسَائِرِ الْمُسْلِمِيْنَ مِنْ كُلِّ ذَنْبٍ. فَاسْتَغْفِرُوْهُ، إِنَّهُ هُوَ الْغَفُوْرُ الرَّحِيْمُ.

KHUTBAH JUM’AT BAHASA JAWA : SYAWAL

KHUTBAH JUM’AT BAHASA JAWA :

SYAWAL

Ed. : ANIS PURWANTO

إِنَّ الْحَمْدَ لِلَّهِ نَحْمَدُهُ وَنَسْتَعِيْنُهُ وَنَسْتَغْفِرُهُ وَنَسْتَهْدِيْهِ وَنَعُوذُ بِاللهِ مِنْ شُرُوْرِ أَنْفُسِنَا وَمِنْ سَيِّئَاتِ أَعْمَالِنَا، مَنْ يَهْدِهِ اللهُ فَهُوَ الْمُهْتَدُ وَمَنْ يُضْلِلْ فَلَنْ تَجِدَ لَهُ وَلِيًا مُرْشِدًا. أَشْهَدُ أَنْ لاَ إِلَهَ إِلاَّ اللهُ وَحْدَهُ لاَ شَرِيْكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُوْلُهُ لاَ نَبِيَّ بَعْدَهُ. اَللَّهُمَّ صَلِّ وَسَلِّمْ وَبَارِكْ عَلَي حَبِيْبِنَا وَشَفِيْعِنَا وَمَوْلَنَا مُحَمَّدٍ وَعَلَى آلِهِ وَأصَحابهِ اْلأَخْيَارِ وَمَنْ تَبِعَهُمْ بِإِحْسَانٍ إِلَى يَوْمِ الدِّيْنِ.

قَالَ تَعَالَي عَزَّ مِنْ قَائِلٍ: يَا أَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ. أَمَّا بَعْدُ.

Ma’asyiral Muslimin jamaah jum’ah rokhimakumullah.

Langkung rumiyin, sumangga kita sami nyaosaken puja puji syukur ing ngarsa dalem Allah SWT, ingkang sampun paring nikmat, rahmat sarta hidayah dhumateng kita sedaya. Sahingga kanthi ijin Allah SWT, kita saget nindakaken ibadah dhumateng Allah SWT. Kita nyuwun dhumaateng Allah SWT mugi-mugi ibadah kita ing siyang punika saget katampi dening Allah SWT, amin ya rabbal ‘alamin.

            Shalawat saha salam mugia katur dhumateng Gusti Rasul, Nabi Agung Muhammad SAW, ingkang sampun mbimbing dhumateng sedaya kaum muslimin, tumuju margi ingkang utami. Mugi-mugi kita sedaya pikantuk syafaatipun mbenjang wanten ing yaumul kiyamah, bekja fiddun ya wal akhirah, amin ya rabbal ‘alamin.

Ma’asyiral Muslimin jamaah jum’ah rokhimakumullah.

            Dinten punika,  kita nembe kemawon mahargya Idul Fitri 1 Syawal 1439 H,  saksampunipun kita nindakaken siyam Ramadhan setunggal wulan wetah. Pengamalamanipun ibadah siyam lan pahargyanipun Idul Fitri mujudaken satunggal rerangkeaning pengibadahan dhumateng Allah SWT. Siyam ing wulan ramadhan lan idul fitri satunggaling kesatuan ingkang saling sesambetan.  Awit tanpa pengamalan siyam ing wulan ramadhan , kesenengan dalah kebahagiaan  ing Idul Fitri  mboten badhe dipun paringake. Utawi tembungipun sanes, tanpa wanten perjuangan, mboten badhe wanten kemenangan engkang saged dipun gayuh. Lan kemenangan punika piyambak,  nembe saged dipun gayuh saksampunipun ngetok sedaya pengorbananipun.  Sepindah malih, Alhamdulillah, kalih-kalihipun sampun kita amalaken kanthi sukses. Mugi-mugi sedaya ibadah kita wiwit anggen kita siyam lan pahargyan idul Fitri ing engjang kala wau katampi dening allah SWT, mugia kita manggih kawilujengan ing ndonya dlan ing akhirat,

Ma’asyiral Muslimin jamaah jum’ah rokhimakumullah.

            Pengibadahan siyam ing wulan Ramadhan ingkang minangka sanepaning satunggalipun perjuangan, lan raos syukur kita kanthi dipun paringaken Idul Fitri ingkang saged dipun anggep lambangipun kemenangan, ingkang pancen namung pantes dipun paringaken dhumateng tiyang engkang seged ngawonaken satunggaling peperangan.  Sedaya sampun dados kasunyatan wiwit ing enjang kala wau. Liripun sampun kita amalaken.

            Dene hikmah ingkang winengku wonten salebetipun pengibadahan siyam  lan idul Fitri punika perlu kita lestantunaken senadyan kita sampun medal saking wulan Ramadhan lan lan sampun mboten wanten ing swasanipun Idul fitri. Ingkang makaten ateges kegiatan ibadah kita punika badhe terus kita lajengaken ngantos dhawahipun wulan ramadha  lan Idul fitri candhakipun.

            Perlu kita aturaken sepindah malih, bilih syawal anggadhahi teges “ningkataken”.  Ningkataken ateges ngangkat satunggaling barang saking papan ingkang andhap dhateng papan ingkang langkung inggil. Mila saking punika, kanthi nyelarasaken  maknanipun syawal , mugi-mugi saksampunipun kita rampung nindakaken pangibadahan ing wulan Ramadhan, sedaya pengibadahan kita dados saya ningkat, jumlah saha mutunipun.

            Wontenipun peningkatan amal makaten punika, jer kedah kita tengenaken lan sekelangkung dipun perlokaken sanget.  Allah SWT ngendika ingkang kasebat ing surat At-Taubah ayat 105 :

وَقُلِ ٱعۡمَلُواْ فَسَيَرَى ٱللَّهُ عَمَلَكُمۡ وَرَسُولُهُ ۥ وَٱلۡمُؤۡمِنُونَ‌ۖ وَسَتُرَدُّونَ إِلَىٰ عَـٰلِمِ ٱلۡغَيۡبِ وَٱلشَّہَـٰدَةِ فَيُنَبِّئُكُم بِمَا كُنتُمۡ تَعۡمَلُونَ

 “Lan sira kondhoa (Muhammad), “Sira kabeh padha tumandang gawea !. Awit Allah lan Utusane sarta para wong mukmin bakal mirani tandang gawe nira, lan sira kabeh bakal dibalekake marang Allah kan ngawuningani barang ghoib lan barang kang nyata, wusana banjur dicritakake marang sira apa bae kang wus kok tindakake”.

 Ma’asyiral Muslimin jamaah jum’ah rokhimakumullah.

            Ayat ing nginggil mengku dhawuh supadas kita beramal kedah kanthi estu-estu ngandhung maksud bilih sedaya amal ibadah kita punika supados saaged mbekta manfaat ingkang saageng-agengipun, kagem kemaslahatan sedaya umat manungsa. Rasulullah paring penget : “AL MU’MINU MIR AATUN LI AKHIIHIL MU’MIN”, wong mukmin iku minangka kaca pangilon tumrape sadulure, yaiku wong mukmin liyane.

            Dhawuh supados dados kaca pangilon makaten punika ateges kita sedaya kedah saged dados conto ingkang sae, insya allah. Pramila saking punika, mesthinipun kanthi sedaya rerangkeanipun pengibadahan wonten ing wulan Ramadhan kalawingi lan idul Fitri ing dinten punika, iman lan taqwa kita saya manteb. Sahingga ing pangajab, kawontenan iman lan taqwa ingkang manteb makaten punika saged nuwuhaken sadhengahipun kesaenan wonten ing masyarakat. Sahingga kanthi syawal punika kita wajib njagi saha ngipuk-ipuk sedaya amal ibadah kita, murih saya ningkat lan tambah sae.

            Akhiripun kanthi pahargyan Idul Fitri ing engjang kala wau, mugia Allah tansah kersa paring rahmad lan ridhanipun dhumateng kita sedaya. Mugi-mugi kita manggih kabegjan lan kawilujengan ing ndonya ngantos ing akhirat.

           

بَارَكَ اللهُ لِيْ وَلَكُمْ فِي الْقُرْآنِ الْعَظِيْمِ، وَنَفَعَنِيْ وَإِيَّاكُمْ بِمَا فِيْهِ مِنَ اْلآيَاتِ وَالذِّكْرِ الْحَكِيْمِ. أَقُوْلُ قَوْلِيْ هَذَا وَأَسْتَغْفِرُ اللهَ الْعَظِيْمَ لِيْ وَلَكُمْ وَلِسَائِرِ الْمُسْلِمِيْنَ مِنْ كُلِّ ذَنْبٍ. فَاسْتَغْفِرُوْهُ، إِنَّهُ هُوَ الْغَفُوْرُ الرَّحِيْمُ.

KHUTBAH IDUL FITRI 1439 H / 2018 M : KANTHI HIKMAHIPUN ‘IDUL FITRI KITA TINGKATAKEN IMAN LAN TAQWA KANGGE NUWUHAKEN AKHLAKUL KARIMAH LAN UKHUWAH ISLAMIYAH

KHUTBAH IDUL FITRI  1439 H / 2018 M

KANTHI HIKMAHIPUN ‘IDUL FITRI KITA TINGKATAKEN IMAN LAN TAQWA KANGGE NUWUHAKEN AKHLAKUL KARIMAH LAN UKHUWAH ISLAMIYAH

Ed. : Anis Purwanto

اللهُ أَكْبَرُ، اللهُ أَكْبَرُ، اللهُ أَكْبَرُ، اللهُ أَكْبَرُ، اللهُ أَكْبَرُ، اللهُ أَكْبَرُ، اللهُ أَكْبَرُ، اللهُ أَكْبَرُ، اللهُ أَكْبَرُ، اللهُ أَكْبَرُ، اللهُ أَكْبَرُ، لَا إِلَهَ إِلَّا اللهُ وَاللهُ أَكْبَرُ وَلِلهِ الْحَمْدُ، اللهُ أَكْبَرُ كَبِيرًا وَالْحَمْدُ لِلهِ كَثِيْرًا وَسُبْحَانَ اللهِ بُكْرَةً وَأَصِيلًا. الْحَمْدُ لِلهِ الَّذِي شَرَعَ لِعِبَادِهِ عِيْدًا يَذْكُرُوْنَهُ فِيْهِ، وَيَشْكُرُوْنَهُ عَلَى فَضْلِهِ وَإِحْسَانِهِ، وَأَشْهَدُ أَنْ لاَ إِلَهَ إِلاَّ اللهُ وَحْدَهُ لاَ شَرِيْكَ لَهُ يَسْتَوِي عِنْدَهُ مَا فِيْ سِرِّ الْعَبْدِ وَإِعْلاَنِهِ، وََأَشْهَدُ أَنَّ مُحَمَّدًا عَبْدُهُ وَرَسُوْلُهُ، أَرْسَلَهُ اللهُ بِالْحَقِّ وَتِبْيَانِهِ، صَلَّى اللهُ عَلَيْهِ وَعَلَى آلِهِ وَأَصْحَابِهِ وَمَنِ اهْتَدَى بِهُدَاهُ، أَمَّا بَعْدُ

Allahu Akbar, Allahu Akbar, Allahu Akbar, laa ilaaha illallahu Allahu Akbar, Allahu Akbar walillahil hamdu.

Jamaah Sholat Idul Fitri Rokhimakumullah.

            Langkung rumiyin, sumanggo kita sami nyaosaken puji lan syukur ing ngarso dalem Allah SWT, ingkang kanthi ijin, rahmat saha pitulunganipun, kita wonten ing enjangipun dinten ‘Idul Fitri ingkang cerah punika saget kempal manunggal wonten ing masjid/musholla, kanthi maksud nindakaken ibadah dhumateng Allah SWT, lan sekaligus minangka bukti anggen kita nglairaken raos syukur kita dhumateng Allah SWT.

Shalawat saha salam mugia katur dhumateng junjungan kita, Nabi Agung Muhammad SAW, ingkang sampun mbimbing dhumateng sedaya kaum muslimin, nuju margi ingkang utami. Mugi-mugi kita sedaya pikantuk syafaatipun mbenjang wanten ing yaumul kiyamah, amin ya rabbal ‘alamin.

Jamaah Sholat Idul Fitri Rokhimakumullah.

            Kita syukuri nikmatipun Allah ingkang awujud dhatengipun ‘Idul Fitri punika mboten sarana ngawontenaken pista pora nuruti hawa nefsu lan selera, lan mboten sarana mubaziraken kanikmatanipun Allah kanthi nindakaken sawarnining pemborosan ingkang jer dadas awisanipun agami kita. Nanging nikmatipun Allah punika kita syukuri kanthi nindakaken ruku’ lan sujud dhumateng Allah ingkang Maha Kuwaos lan Maha Tunggal. Lesan utawi tutuk kita mboten kendel-kendel anggenipun memuji dhumateng Allah, sesarengan ngucapaken kalimat takbir : “ALLAHU AKBAR, ALLAHU AKBAR, ALLLAHU AKBAR” dipun gandheng kaliyan kalimah tauhid : “LAA ILAAHA ILLALLAH”, lan dipun lengkapi mawi kalimah tahmid : “WA LILLAAHIL HAMDU”.

            Angkasa ingkang wiyar kebak kanthi gema saha kumandhangipun kalimah suci makaten punika, tetela saged nundhukaken manahipun tiyang-tiyang ingkang iman lan nggumeteraken jiwaipun kaum Muslimin lan Muslimat.

            Para sedherek, salebetipun mahargya dinten ‘Idul Fitri makaten punika, wanten cara kalih ingkang sampun dipun garisaken dining Allah SWT. Ingkang sepisan, awujud sesambetan antawisipun Khaliq lan makhuq, inggih punika ingkang dipun sebat “hambun minallah”. Lang ingkang angka kalih, ningkataken hubungan kasih sayang ing antawiisipun sesaminipun makhluq, ingkang dipun sebat “hablun minannas”. Ingkang kapisan dipun tindakaken sarana ngegungaken asmanipun Allah, inggih punika kanthi ngucapaken takbir, tahlil lan tahmid; “ALLAAHU AKBAR, LAA ILAAHA ILLALLAH WALILLAAHIL HAMDU”. Ucapan lesan ingkang ngumandhang wonten ing angkasa punika, dipun kantheni sikep dhepe-dhepe dhumateng Allah, nundhukaken jiwa raga, ngabektos wonten ngarsanipun Allah, kanthi nindadaken shalat ‘Ied wanten ing Masjid-Masjid, Musholla-Musholla utawi ing lapangan-lapangan.

            Wondene cara ingkang angka kalih, saderengipun ngawontenaken hubungan lan nyaketaken jiwa raganipun dhumaten Allah, kaum muslimin langkung rumiyin kedah netepi kuwajibanipun dhateng sesaminipun, utaminipun dhumateng kaum fakir miskin,  sarana mbayaraken zakat fitrahi, minangka “TUHRATAN LIS SHAAIMIN WATHU’MATAN LIL MASAAKIN”, pencuci jiwa tumrapipun tiyang ingkang siyam lan minangka nyukani tedha dhateng para fakir miskin.

            Alhamdulillah, kita nembe kemawon rampung nindakaken ibadah siyam, ingkang mengku tujuan lan hikmah ingkang paripurna, ingkang nggembleng jiwa raga kita dados teguh lan kiyat, mbentuk watak lan kapribaden kita dados luhur, mbentuk sikep kita dados sikep ingkang tansah siap, lan ndamel disiplin kita dados disiplin ingkang kiyat . kita medal saking wulan Ramadhan dipun sanepakaken kados dene prajurit ingkang  wangsul saking peperangan kanthi mbekta kemenangan. Lan kita medal saking wulan Ramadhan saged dipun ibarataken kadas dene bayi ingkang nembe lahir saking kandhunganing ibunipun, resik lan suci, insya Allah.

Allahu Akbar 3 X Walillahil-hamd.

Jamaah Sholat Idul Fitri Rokhimakumullah.

            Ing Swasana ‘Idul Fitri taun punika mboten sami kaliyan kita ber ‘Idul fitri wonten ing taun-taun kepengker. Wonten satunggaling keistimewaan pinanggih ing salebetipun ‘Idul Fitri samangke kita bangsa Indonesia klebet umat Islamipun, nembe nedheng-nedhengipun ngadhepi satunggaling pakaryan nasional, inggih punika pemilukada serentak, ingkang insya Allah badhe kaleksanan mbenjang dinten Rabu Pon tanggal 27 Juni 2018, insya Allah.  Kanthi makaten, khususipun pihak penyelenggara tartamtu terus menerus nyiapaken uba rampe ngantos titi wanci  coblosan mbenjang.

Pramila saking punika para sederek, kewajiban kita minangka rakyat Indonesia mboten wonten sanes kejawi mesthi lan wajib anyengkuyung lan nderek nyuksesaken pemilukada tahun 2018 punika, Awit kanthi Pemilukada punika badhe kita pilih Gubernur  lan Wakil Gubernur Jawa Timur, minangka pimpinan “masa depan”.  Sumangga kita usahakaken Pemilukada mangke saged mlampah kanthi lancar, aman, tertib lan tentrem. Mila salajengipun mangga kita sami nyuwun dhumateng Allah SWT, mugi-mugi Gubernur/Wakil guberbur pilihan rakyat asil Pemilukada mangke dipun paringi kekiyatan lahir batos dening Allah SWT lan ugi dipun paringi hidayah lan taufiqipun, sahingga saged mimpin Jawa Timur , nuju masyarakat Jawa Timur langkung sejahtera, adil, mandiri , anggadhai daya saing inggil lan kagungan ahklakul karimah.

Jamaah Sholat Idul Fitri Rokhimakumullah.

Maha Agung Allah, ingkang nyipta sedaya kawontenn punika kanthi paripurna. Lan Maha wicaksana Allah ingkang ndadosaken sedaya aturan lan sunah-sunahipun punika sarwi ceples. ‘Idul Fitri dipun tetepaken saksampunipun ibadah siyam. Fitrah kesucian dipun wangsulaken, saksampunipun imsak, meper saking sedhengah pepinginan lan hawa nefsu. Sedaya punika supados dados bahan piwucal tumraping tiyang-tiyang ingkang sami purun mikir, ingkang nedya ningkataken ketaqwaanipun dhumateng Allah SWT. Allah SWT ngendika ingkang  kahemot ing Surat Al-Hasyr ayat 21  :

وَتِلۡكَ ٱلۡأَمۡثَـٰلُ نَضۡرِبُہَا لِلنَّاسِ لَعَلَّهُمۡ يَتَفَكَّرُونَ

 “lan sanepan-sanepan iku Ingsun cipto kanggo para manungsa, kang supaya wong-wong mau padha gelem mikir”.

            Para sederek, Mugi-mugi kanthi Fitratil Islam ingkang ‘Ied-ipun kita pahargya wonten ing dinten punika, jiwa lan manah kita sageda wangsul dados suci kados sucinipun fitrah punika. Kanthi fitrahipun manah lan jiwa punika, mugi-mugi kita saya gandrung dhateng kesatuan lan persatuan, ngutamekaken pasedherekan ingkang kebak katresnan, lan kasih sayang, ngapura ingapura, nyingkiri saking sipat memengsahan, fitnah menfitnah, lan sregeb lelumban onten ing babagan kesaenan.

وَسَارِعُوٓاْ إِلَىٰ مَغۡفِرَةٍ۬ مِّن رَّبِّڪُمۡ

 “Lan sira kabeh padha gegancangana nyuwuyn pangapura marang Pangeranira”. (QS. Ali Imran : 133).

            Mugi-mugi kanthi hikmahipun ‘idul Fitri punika kita sedaya saged nikataken iman lan taqwa kita dhumateng Allah SWT kangge nuwuhaken ahklakul karimah lan ukhuwah islamiyah. Sahengga pantes sinebat ummatan wasathan utawi umat teladan, kados ingkang dipun kersakaken dening Allah SWT. Kasebat wanten ing Kitab Suci al-qur’an Surat Ali Imran ayat 110 :

كُنتُمۡ خَيۡرَ أُمَّةٍ أُخۡرِجَتۡ لِلنَّاسِ تَأۡمُرُونَ بِٱلۡمَعۡرُوفِ وَتَنۡهَوۡنَ عَنِ ٱلۡمُنڪَرِ وَتُؤۡمِنُونَ بِٱللَّهِ‌ۗ وَلَوۡ ءَامَنَ أَهۡلُ ٱلۡڪِتَـٰبِ لَكَانَ خَيۡرً۬ا لَّهُم‌ۚ مِّنۡهُمُ ٱلۡمُؤۡمِنُونَ وَأَڪۡثَرُهُمُ ٱلۡفَـٰسِقُونَ

 “Sira kabeh iku sabecik-becike ummat, kang dicipta dening Allah kanggo kepentingane para manungsa. Yaiku supaya sira kabeh padha akona marang wong-wong mau kang supaya padha nindakaake kebecikan lan nyegah saka tumindak kejahatan, lan supaya sira kabeh padha iman marang Allah”.

            Para sederek, adedasar dhawuh pangandikanipun Allah SWT punika, kita saged mendhet kesimpulan bilih umat teladan miturut Allah SWT inggih punika umat ingkang iman dhumateng Allah SWT lan lelumban ing babagan amar makruf nahi mungkar.

Allahu Akbar 3 X Walillahil-hamd.

Ing tengah-tengaipun swasono gumbira, kados ing saat punika, wanten kalimat ingkang asring kita aturaken, inggih punika kalimat “minal ‘aidin wal faidzin” kanthi panyuwun mugi-mugi Allah SWT ndadosaken kita kalebet golonganipun tiyang ingkang wangsul dhateng kesucian lan pikantuk kabekjan. Lan saksampunipun shalat Idul Fitri, kita nuli sami salam-salaman, ngapunten-ingapuntenan, halal bihalal lan bersilaturahmi dhumateng para sanak kadang lan sedherek. Sedaya punika mbaten uwal saking semangat siyam lan amaliyah Ramadhan.

Jama’ah Shalat idul Fitri Rakhimakumullah.

Akhiripun kanthi hikmah Idul Fitri kita tingkataken iman lan taqwa kita dhumateng Allah SWT, sumangga kita tingkataken partisipasi kita wanten ing babagan kesaenan, kalebet partisipasi kita ing babagan pembangunan wanten ing sedaya bidang selaras kaliyan pakaryan lan profesi kita piyambak-piyambak.  Sahingga kacipta masyarakat madani, adil makmur kanthi ridlo Allah, baldatun thoyyibatun wa rabbun ghofuur, bekja fi dun ya wal akhirah. Amin ya rabbal ‘alamin.

Selajengipun kangge penutup khotbah, sumangga kita nundukaken sirah lan ngeningaken manah, nyuwun dhumateng Allah SWT kanthi ihklas karana Allah SWT, mugi-mugi sedaya panjangka kita saget dipun kabulaken Allah SWT.

بَارَكَ اللهُ لِي وَلَكُمْ فِي الْقُرْآنِ الْعَظِيْمِ. وَنَفَعَنِي وَاِيِّاكُمْ بما فيه مِنَ الآيَاتِ وَالذِّكْرِ الْحَكِيْمِ. وَتَقَبِّلَ الله مِنِّي وَمِنْكُمْ تِلاوَتَهُ اِنَّهُ هُوَالسَّمِيْعُ الْعَلِيْمُ. أقُوْلُ قَوْلِي هَذا وَأسْتَغْفِرُوا اللهَ الْعَظِيْمَ لِي وَلَكُمْ وَلِسَائِرِ الْمُسْلِمِيْنَ وَالْمُسْلِمَاتِ وَالْمُؤْمِنِيْنَ وَالْمُؤْمِنَاتِ فَاسْتَغْفِرُوْهُ إنَّهُ هُوَ الْغَفُوْرُ الرَّحِيْم.