KHUTBAH JUM’AT BAHASA JAWA
MUKMIN
SEJATI
Oleh : Drs. Anis Purwanto
إِنَّ
الْحَمْدَ لِلَّهِ نَحْمَدُهُ وَنَسْتَعِيْنُهُ وَنَسْتَغْفِرُهُ وَنَسْتَهْدِيْهِ
وَنَعُوذُ بِاللهِ مِنْ شُرُوْرِ أَنْفُسِنَا وَمِنْ سَيِّئَاتِ أَعْمَالِنَا، مَنْ
يَهْدِهِ اللهُ فَهُوَ الْمُهْتَدُ وَمَنْ يُضْلِلْ فَلَنْ تَجِدَ لَهُ وَلِيًا
مُرْشِدًا. أَشْهَدُ
أَنْ لاَ إِلَهَ إِلاَّ اللهُ وَحْدَهُ لاَ شَرِيْكَ لَهُ وَأَشْهَدُ أَنَّ
مُحَمَّدًا عَبْدُهُ وَرَسُوْلُهُ لاَ نَبِيَّ بَعْدَهُ. اَللَّهُمَّ صَلِّ
وَسَلِّمْ وَبَارِكْ عَلَي حَبِيْبِنَا وَشَفِيْعِنَا وَمَوْلَنَا مُحَمَّدٍ
وَعَلَى آلِهِ وَأصَحابهِ اْلأَخْيَارِ وَمَنْ تَبِعَهُمْ بِإِحْسَانٍ إِلَى
يَوْمِ الدِّيْنِ.
قَالَ
تَعَالَي عَزَّ مِنْ قَائِلٍ: يَا أَيُّهَا الَّذِينَ آمَنُوا اتَّقُوا اللَّهَ
حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ. أَمَّا بَعْدُ.
Ma’asyiral Muslimin jamaah jum’ah rokhimakumullah.
Minangka
pambukaning atur, sumangga kita aturaken puja puji syukur ing ngarsa dalem
Allah SWT, ingkang sampun paring taufik sarta hidayah dhumateng kita sedaya,
sahingga ing siyang punika kita saget nindakaken ibadah jum’at kanthi iklas
krana Allah SWT. Kita nyuwun dhumateng Allah SWT, mugi-mugi ibadah kita saget
katampi dening Allah SWT, wilujeng ing ndonya ngatos ing akhirat. Shalawat dalah
salam kunjuk dhumateng junjungan kita Nabi Agung Muhammad SAW, ingkang kita
antu-antu syafaatipun mbenjang ing yaumul kiyamah, amin ya rabbal ‘alamin.
Ma’asyiral Muslimin jamaah jum’ah rokhimakumullah.
Al-Qur’an
ingkang minangka hidayah lan rahmat tumraping tiyan-tiyam muttaqin sayektos isi
keterangan-keterangan ingkang mujudaken pitedah wanten ing babagan punapa
kemawon, lan manawi dipun amalaken, saestu badhe ndatengaken ramat welas
asihipun Allah SWT.
Salah
satunggalipun keteranganipun Al-Qur’an ingkang njelasaken pengertosanipun
mukmin sejatos, kados ingkang kahemot ing Surah Al Anfal ayat 2-4 :
إِنَّمَا
ٱلۡمُؤۡمِنُونَ ٱلَّذِينَ إِذَا ذُكِرَ ٱللَّهُ وَجِلَتۡ قُلُوبُہُمۡ وَإِذَا
تُلِيَتۡ عَلَيۡہِمۡ ءَايَـٰتُهُ ۥ زَادَتۡہُمۡ إِيمَـٰنً۬ا وَعَلَىٰ
رَبِّهِمۡ يَتَوَكَّلُونَ (٢) ٱلَّذِينَ يُقِيمُونَ ٱلصَّلَوٰةَ وَمِمَّا
رَزَقۡنَـٰهُمۡ يُنفِقُونَ (٣) أُوْلَـٰٓٮِٕكَ هُمُ ٱلۡمُؤۡمِنُونَ حَقًّ۬اۚ
لَّهُمۡ دَرَجَـٰتٌ عِندَ رَبِّهِمۡ وَمَغۡفِرَةٌ۬ وَرِزۡقٌ۬ ڪَرِيمٌ۬
“Wong-wong mukmin yaiku mung wong-wong kang
yen asmane Allah disebut-sebut, atine banjur gumeter (jalaran wedi). Lan yen
ayat-ayat Allah diwacakake marang wong-wong mau, imane banjur tambah saya
kuwat. Lan marang Pangerane, wong-wong mau padha tawakal. Yaiku wong-wong kang
ngedegake shalat, lan padha nginfakake sebagian rizki kang wus sun paringake
marang wong-wong mau. Wong-wong kang mangkono iku yaiku wong-wong mukmin
sejati. Marang wong-wong mau diparingake derajat sapirang-pirang, saka ngarsane
Pangerane, lan kaparingan pangapura sarta rizki mulya”.
Para
sedherek, kanthi adedasar ayat menika selajengipun kados pundi kita saget
pikantuk pitulunganipun Allah, kados pundi kita kaparingan pitulung, kekiyatan,
sahingga kita kagolong ewonipun tiyang mukmin engkang sejatos. Bab punika
pancen dumunung wonten ing ngarsanipun Allah SWT piyambak. Ananging Allah ugi
badhe ngabulaken panyuwunanipun kawula, ingkang estu-estu nyuwun dhumateng
Panjenenganipun. Awit kaget utawi
gumetering manah nalika miring asmanipun Allah dipun sebat, punika tiyang
asring nyebat “watak” utawi “gawan bayi”.
Nanging senadyan makaten, manawi mboten dipun latih lan boten dipun
kulinakaken, ugi mboten badhe saged dados manah engkang “getapan”, gumeter yen
mireng asmanipun Allah dipun sebat.
Makaten
ugi pengamalan-pengamalan sanesipun, usaha nambah kiyating iman kanthi sregep
lan ngulinakaken mirengaken ayat-ayat Al-Qur’an, ngedegaken shalat lan
sapanunggalanipun sedaya punika sageta dados kapribaden, dados sipat ingkang
langgeng, pancen kedah dipun biasakaken sarana niat ingkang ihklas, kanthi
nyuwun hidayah dhumateng Allah, rahmat lan maunahipun. Kasebat ing Al-Qur’an
susat Al-Mu’min ayat 60, Allah ngendika
:
وَقَالَ رَبُّڪُمُ
ٱدۡعُونِىٓ أَسۡتَجِبۡ لَكُمۡۚ إِنَّ ٱلَّذِينَ يَسۡتَكۡبِرُونَ عَنۡ عِبَادَتِى
سَيَدۡخُلُونَ جَهَنَّمَ دَاخِرِينَ
“Lan Pangeranira wis paring dhawuh : “Sira
kabeh padha nyuwuna marang Ingsun, tentu Ingsun ngabulake panyuwunira. Satemene
wong-wong kang nyombongake dirine saka nyembah marang Ingsun (ora gelem nyembah
marang Allah), wong-wong mau bakal mlebu ana sajrone neraka jahanam kanthi
kahanan ina”.
Naati
dhawuhipun Allah kanthi nindakaken sadaya dhawuhipun lan nilaraken awisanipun,
punika kita raosaken awrat. Nanging , sauger dipun tindakaken kanthi ihklas
karana ngupadi ridlanipun Allah SWT, sarana latihan kanthi terus-terusan, malah
manawi perlu kanthi peksan, insya Allah manawi sampun mapan, akhiripun ugi
mboten kraos awrat. Awit pancen sampun dados pakulinan. Pakulinan nindakaken
kesaenan.
Ma’asyiral Muslimin jamaah jum’ah rokhimakumullah.
Sedaya
syarengatipun agami punika manawi dipun laksanakaken kanthi saestu, pancen
mujudaken sarana kangge anggayuh kawilujengan dalah kabegjan ing ndonya ugi ing
akhirat. Kanthi makaten, sumangga dhawuh pangandikanipun Allah ingkang minangka
dhawuh supadosa kita mboten nyombongaken diri saking nyembah Allah, kita
estokaken. Nindakaken dhawuh lan nilaraken awisan, kawiwitan kanthi raos awrat,
nanging kanthi terus ambudidaya sekiat kemampuan kita, kanthi nyuwun
pitulunganipun Allah SWT. Insya Allah saya dangu saya entheng, lan dados
kapribaden kita minangka kaum mukmin.
Atur
keterangan singkat punika kita aturaken sekedar asipat informasi, kanthi tujuan supados kita langkung mangertos
lan faham kanthi mendalam ing babagan mukmin sejatos. Ing pangajab segeda
ningkataken mental, iman lan taqwa kita dhumateng Allah SWT lan supados saged
langkung ngatos-atos wonten ing sadhengah tindak tanduk kita, sampun ngantor
kajrumus wanten ing juranging kekufuran.
Nyuwun
hidayah dhumateng Allah SWT sayektos sampun kita taindakaken, paling sekedik
sidinten sedalu kaping 17, inggih punika salebetipun kita nindakaken shalat
gangsal wekdal. Mila mugi-mugi panyuwunan kita menika estu-estu saged dipun
kabulaken dening Allah , ingkang hanani kita dados tiyang-tiyang mukmin
sejatos.
بَارَكَ اللهُ
لِيْ وَلَكُمْ فِي الْقُرْآنِ الْعَظِيْمِ، وَنَفَعَنِيْ وَإِيَّاكُمْ بِمَا
فِيْهِ مِنَ اْلآيَاتِ وَالذِّكْرِ الْحَكِيْمِ. أَقُوْلُ قَوْلِيْ هَذَا
وَأَسْتَغْفِرُ اللهَ الْعَظِيْمَ لِيْ وَلَكُمْ وَلِسَائِرِ الْمُسْلِمِيْنَ مِنْ
كُلِّ ذَنْبٍ. فَاسْتَغْفِرُوْهُ، إِنَّهُ هُوَ الْغَفُوْرُ الرَّحِيْمُ.
(Dipun kutib saking pinten-pinten seratan)
