KHUTBAH JUM'AT BAHASA JAWA : NINDAKAKEN AMAL SHALIH

KHUTBAH JUM’AT

NINDAKAKEN AMAL SHALIH

Dening : ANIS PURWANTO

Ma’asyiral Muslimin jamaah jum’ah rokhimakumullah.

            Kegem pambukaning khutbah, sumangga kita aturaken puja puji syukur ing ngarsa dalem Allah SWT, ingkang sampun paring rahmat saha hidayah dhumateng kita sedaya, sahingga wanten ing siyang punika kita sedaya saget nindakaken dawuhipun, kanthi ihklas karana Allah. Mugi-mugia kita saget manggih kawilujengan ing donya dalah ing akhirat. Shalawat saha salam kita aturaken dhumateng junjungan kita Nabi Muhammad SAW.

Ma’asyiral Muslimin jamaah jum’ah rokhimakumullah.

            Wanten ing kitab suci Al-Qur’an kathah sanget ayat ingkang nerangaken bab keutamen nindakaken amal shalih. Ing antawisipun inggih punika, kasebat wanten ing surat An-Nahl ayat 97 :

مَنۡ عَمِلَ صَـٰلِحً۬ا مِّن ذَڪَرٍ أَوۡ أُنثَىٰ وَهُوَ مُؤۡمِنٌ۬ فَلَنُحۡيِيَنَّهُ ۥ حَيَوٰةً۬ طَيِّبَةً۬‌ۖ وَلَنَجۡزِيَنَّهُمۡ أَجۡرَهُم بِأَحۡسَنِ مَا ڪَانُواْ يَعۡمَلُونَ

“Sapa wonge kang nindakake amal saleh, lanang utawa wadon, lan dheweke iku wong iman, temenan Ingsun mesthi paring panguripan kang becik marang dheweke, lan Ingsun mesthi paring piwales marang dheweke kanthi kang luwih becik tinimbang apa-apa kang wis ditindakake  dheweke”. 

            Ayat punika nerangaken kautamenipun amal saleh. Tiyang ingkang  nindakaken amal saleh, dipun jamin dening Allah kanthi dipun paringi pagesangan ingkang ngremenaken wonten ing ndonya, dipun paringi ganjaran ingkang langkung sae. Lan mbenjang wanten ing aakhirat badhe dipun papanaken wanten ing swarga. Dene tiyang ingkang nindakaken perkawis awon, Allah ingkang Maha wicaksono ugi mesthi paring piwales . Kados ingkang sampun dipun aturaken wanten ing Al-Qur’an Surat Fush-shilat ayat 46 :

مَّنۡ عَمِلَ صَـٰلِحً۬ا فَلِنَفۡسِهِۦ‌ۖ وَمَنۡ أَسَآءَ فَعَلَيۡهَا‌ۗ وَمَا رَبُّكَ بِظَلَّـٰمٍ۬ لِّلۡعَبِيدِ

 “Sing sapa wonge nindakake amal saleh, ganjarane amal saleh mau kanggo awake wong sing nindakake amal saleh dhewe. Lan sing sapa wonge nindakake tumindak ala, dosane uga ditanggung dhewe. Lan babar pisan Pangeranira iku ora nganiaya marang para kawulane”. 

Ma’asyiral Muslimin jamaah jum’ah rokhimakumullah.

            Selajengipun sumangga kita sami lelomban wonten ing bidhang amal shaleh, kanthi nyuwun kekiyatan lahir batos dhumateng Allah, lan nyuwun hidayah saha taufiq dhateng panjenenganipun, kanthi tekat mboten wonten wekdal ingkang kabucal tanpa nindakaken amal shaleh, mesthinipun sekiyat kemampuan kita piyambak-piyambak, ananging mesthi kita tindakaken.

Yen kita menika konsekwen dados tiyang mukmin-muslim, temtu tuntunanipun agama Islam punika kita amalaken, kanthi kebak keihklasan lan ketaatan. Lan makaten estu anggen kita ngamalaken agami Islam , kita yakin kita badhe dipun paringi pagesangan ingang ngremenaken , wilijeng ing ndonya dalah ing akhirat.

KHUTBAH JUM'AT BAHASA JAWA : PITULUNGANIPUN ALLAH

KHUTBAH JUM’AT

PITULUNGANIPUN ALLAH

Dening : ANIS PURWANTO

Ma’asyiral Muslimin jamaah jum’ah rokhimakumullah.

            Kegem pambukaning khutbah, sumangga kita aturaken puja puji syukur ing ngarsa dalem Allah SWT, ingkang sampun paring rahmat saha hidayah dhumateng kita sedaya, sahingga wanten ing siyang punika kita sedaya saget nindakaken dawuhipun, kanthi ihklas karana Allah. Mugi-mugia kita saget manggih kawilujengan ing donya dalah ing akhirat. Shalawat saha salam kita aturaken dhumateng junjungan kita Nabi Muhammad SAW.

Ma’asyiral Muslimin jamaah jum’ah rokhimakumullah.

            Wanten ing kawontenan ingkang kebak bagio mulyo kados ing siang punika, keparenga kulo nyaosi pirso malih, bilih kito dipun titahaken dening Allah punika mujudaken mahkluk ingkang minulyo. Keterangan punika kita landasaken atas ngendikanipun Allah wonten ing Al-Qur’an surat Al-Isra’ ayat 70 :

وَلَقَدۡ كَرَّمۡنَا بَنِىٓ ءَادَمَ وَحَمَلۡنَـٰهُمۡ فِى ٱلۡبَرِّ وَٱلۡبَحۡرِ وَرَزَقۡنَـٰهُم مِّنَ ٱلطَّيِّبَـٰتِ وَفَضَّلۡنَـٰهُمۡ عَلَىٰ ڪَثِيرٍ۬ مِّمَّنۡ خَلَقۡنَا تَفۡضِيلاً

 “lan satemene Ingsun wus mulyakake keturunane Adam, lan Sun angkat wong-wong mau ana ing dharat lan segoro, lan Sun paringi rizki saka barang-barang kang becik-becik. Lan Sun istimewakake wong-wong mau kanthi keistimewaan kang sampurna, ngungkuli mahkluk-mahkluk kan Sun cipto liyane”.

            Namun manungsa ugi mujudaken mahkluk ingkang dipun cipta dening Allah kanthi kawontenan ingkang ringkih, malah tukang ngangkluh, tur tukang rewel. Bab punika  kita dasaraken atas pangandikanipun Allah wanten ing Al-Qur’an Surat an-Nisa’ ayat 28 :

يُرِيدُ ٱللَّهُ أَن يُخَفِّفَ عَنكُمۡ‌ۚ وَخُلِقَ ٱلۡإِنسَـٰنُ ضَعِيفً۬ا

 “Allah iku ngersakake paring ke-enthengan marang sira kabeh, lan manungsa iku dititahake kanthi kahanan ringkih”.

            Nanging ugi dipun tegasaken dening Allah, bilih mboten sedoyo manungsa punika makaten. Ugi wanten manungsa ingkang dipun takdir dados sae. Kados kasebat wanten ing Al-Qur’an Surat Ma’arij ayat 22-27:

إِلَّا ٱلۡمُصَلِّينَ (٢٢) ٱلَّذِينَ هُمۡ عَلَىٰ صَلَاتِہِمۡ دَآٮِٕمُونَ (٢٣) وَٱلَّذِينَ فِىٓ أَمۡوَٲلِهِمۡ حَقٌّ۬ مَّعۡلُومٌ۬ (٢٤) لِّلسَّآٮِٕلِ وَٱلۡمَحۡرُومِ (٢٥) وَٱلَّذِينَ يُصَدِّقُونَ بِيَوۡمِ ٱلدِّينِ (٢٦) وَٱلَّذِينَ هُم مِّنۡ عَذَابِ رَبِّہِم مُّشۡفِقُونَ (٢٧)  

“Kejaba wong-wong kang negakake shalat, yaiku wong-wong kang tetep nindakake shalate. Lang wong-wong kang ing sajrone bandhone ana sebagian kang disediakake kanthi tartamtu, kanggo wong miskin kan njaluk, lan wong kang kang ora nduwe apa-apa nanging ora gelem njaluk. Lan wong-wong kang mbenerake marang onone dina piwales  . lan wong-wong kang wedi marang pasiksane Pangerane”

Ma’asyiral Muslimin jamaah jum’ah rokhimakumullah.

            Makaten sawatawis ayat Al-ur’an ingkang nerangaken sipat lan watakipun manungsa.  Gandheng manungsa punika katitahaken kanthi kawontenan ingkang ringkih lan terbatas ing samudayanipun, mila manungsa mboten badhe saged bebas lan lepas saking nyuwun pitulung utawi bantuan dhateng sanesipun, utaminipun dhumateng Gusti Allah.

            Ing wusana tuwuh pitaken punapa panyuwun tulung kita dhumateng Allah mesti dipun tampi, lan punapa kemawon syaratipun ingkang supados panyuwun tulung kita punika dipun tampi lan dipun sembadani dening Allah. Sedaya punika jawabanipun kados kasebat wanten ing Al-Qur’an Surat Al-Haj ayat 40-41:

وَلَيَنصُرَنَّ ٱللَّهُ مَن يَنصُرُهُ ۥۤ‌ۗ إِنَّ ٱللَّهَ لَقَوِىٌّ عَزِيزٌ (٤٠) ٱلَّذِينَ إِن مَّكَّنَّـٰهُمۡ فِى ٱلۡأَرۡضِ أَقَامُواْ ٱلصَّلَوٰةَ وَءَاتَوُاْ ٱلزَّڪَوٰةَ وَأَمَرُواْ بِٱلۡمَعۡرُوفِ وَنَهَوۡاْ عَنِ ٱلۡمُنكَرِ‌ۗ وَلِلَّهِ عَـٰقِبَةُ ٱلۡأُمُورِ

“Lan temen-temen Allah iku mesthi nulung marang wong kang nulung agamane. Satemene Allah iku nyata-nyata Maha kuat tur Maha prakoso.Wong-wong kang entuk pitulungane Allah yaiku wong-wong kang yen Sun teguhake kalungguhane ana ing lumahing bumi, wong-wong mau tetep padha negakake shalate lan tetep anggone padha mbayar zakat, lan padha amar makruf nahi mungkar. Lan marang Allah sakabehe urusan iku bali”.

            Mugi-mugi Alah tansah wanten keparengipun njagi lan paring pitulungan dumaten kita sedaya, sahingga kita wilujeng saking sedaya pacoben dalah pasiksan ing ndonya lan ing akhirat, amin ya rabbal alamin.